Rais wa Nigeria amesema waumini 38 waliotekwa nyara kanisani Nigeria wameokolewa

Rais wa Nigeria, Bola Tinubu, alisema Jumapili kwamba waumini 38 waliotekwa nyara walipovamiwa ibada kanisani wiki iliyopita, tukio lililoua watu wawili, wameokolewa.

"Shukrani kwa jitihada za vikosi vyetu vya usalama katika siku chache zilizopita, waumini wote 38 waliotekwa nyara Eruku, Jimbo la Kwara wameokolewa," Tinubu aliandika kwenye akaunti yake ya X, akirejea shambulio lililorekodiwa na kurushwa mtandaoni.

Video ilionyesha ibada ikikatizwa na risasi na watoto walisikika wakiulia nje.

Mtu mmoja mwenye silaha anaonekana akiwakimbiza waumini, wakati wengine wakiiba mali za watu ndani ya Kanisa la Pentecostal Christ Apostolic.

Tinubu ameghairi shughuli zake za kimataifa.

Tinubu, ambaye ameghairi shughuli zake zote za kimataifa kufuatia msururu wa mashambulizi ya vurugu siku za hivi karibuni, hakutoa maelezo ya nani alikuwa nyuma ya shambulio hilo wala mazingira ya jinsi waliotekwa nyara walivyookolewa.

Alisema pia: "Nafurahi pia kwamba wanafunzi 51 kati ya waliotekwa wa Shule ya Kikatoliki katika Jimbo la Niger wamepatikana."

Chama cha Wakristo cha Nigeria kilitangaza mapema Jumapili kwamba watoto 50 kati ya zaidi ya 300 waliotekwa nyara na wanamgambo kutoka shule ya Kikatoliki siku ya Ijumaa walitoroka kutoka kwa watekaji wao.

Kuna hofu inayoongezeka kuhusu usalama nchini Nigeria kufuatia utekaji nyara wa wanafunzi kwa wingi katika shule mbili na shambulio kanisani.

"Sitapunguza juhudi"

Mashambulizi hayo yalitokea wakati Rais wa Marekani, Donald Trump, alipotishia hatua za kijeshi dhidi ya kile alichokitaja kama unyanyasaji wa Wakristo na magaidi nchini Nigeria.

Tinubu alisema alikuwa "anafuatilia kwa karibu hali ya usalama nchini kote na anapokea taarifa za mara kwa mara kutoka mstari wa mbele."

"Sitapunguza juhudi. Kila Mnyigeria, katika kila jimbo, ana haki ya usalama — na chini ya uangalizi wangu, tutahakikisha tunalinda taifa hili na kulinda watu wetu."