Muungano wa Makkah uko wazi kwa nchi nyingine zenye maono ya pamoja ya amani: Fidan

Waziri wa Mambo ya Nje wa Uturuki, Hakan Fidan, amesema muungano wa ulinzi wa Makkah ulioanzishwa na Uturuki, Pakistan na Saudi Arabia uko wazi kwa nchi nyingine za eneo hilo zenye maono ya pamoja ya amani katika juhudi za kuimarisha usalama na utulivu wa kikanda.

Fidan alitoa kauli hiyo kupitia makala yake, “The Role of Regional Ownership in Our Foreign Policy: The Mecca Defence Alliance”, iliyochapishwa katika toleo la Novemba la jarida la kila mwezi la AA Briefing, linalotolewa na shirika la habari la Anadolu.

Alieleza kuwa Uturuki ilitia saini Mkataba wa Ulinzi wa Pamoja wa Makkah, kwa kushirikiana na Pakistan na Saudi Arabia kutokana na dhamira ya pamoja ya mataifa hayo ya kutafuta suluhu za changamoto za kikanda kupitia ushirikiano wa nchi za eneo husika.

Kwa mujibu wa Fidan, muungano huo unalenga kuchangia kuimarika kwa utulivu wa kikanda kwa kuimarisha uwezo wa kujilinda na kuzuia vitisho vinavyoweza kuhatarisha usalama.

Alisisitiza kuwa Muungano wa Ulinzi wa Makkah unaendana na vipaumbele muhimu vya kimkakati vya sera ya mambo ya nje ya Uturuki, ambavyo ni pamoja na kuimarisha amani na utulivu wa kikanda, maendeleo na ustawi wa jamii, kupanua mifumo ya kitaasisi ya mahusiano ya kidiplomasia na kuchangia mageuzi ya mfumo wa utawala wa kimataifa.

Fidan pia alibainisha kuwa mfumo wa sasa wa usimamizi na utawala wa masuala ya kimataifa unapitia kipindi kigumu cha misukosuko, huku Mashariki ya Kati ikiwa kitovu cha changamoto nyingi zinazoikabili dunia.

Dira ya Uturuki kuhusu maendeleo ya kikanda na kimataifa

Katika makala hiyo, Fidan alichambua pia mifumo ya kitaasisi inayosimamia mahusiano ya Uturuki na mataifa mengine, hali ya mfumo wa utawala wa kimataifa pamoja na mtazamo wa Uturuki kuhusu mwelekeo wa baadaye wa masuala ya kikanda na dunia kwa ujumla.

Toleo la Novemba la jarida la AA Briefing limejikita katika kuchunguza mielekeo miwili inayojitokeza kwa wakati mmoja katika eneo linaloanzia Iran hadi Pembe ya Afrika.

Jarida hilo linatoa uchambuzi kuhusu kuibuka kwa eneo la pili la mapambano ya baharini katika mzozo kati ya Marekani na Iran, kupitia Yemen na Mlango-Bahari wa Bab al-Mandab. Pia linajadili kuongezeka kwa wasiwasi wa Ulaya kuhusu Urusi, hali ya usalama katika Bahari Nyeusi na maandalizi ya Mkutano wa Umoja wa Mataifa kuhusu Mabadiliko ya Tabianchi (COP31), ambao unatarajiwa kufanyika nchini Uturuki.

Kwa ujumla, AA Briefing hutoa uchambuzi wa masuala yanayoathiri dunia na maeneo mbalimbali, kwa kuzingatia tathmini za wataalamu, maoni ya kipekee, tafiti na vielelezo vya takwimu. Maudhui yake yanahusu diplomasia, usalama, uchumi, teknolojia, mazingira na mabadiliko ya kijamii.

Lengo la jarida hilo ni kuwapatia watunga sera, wasomi, watafiti, wanahabari na wasomaji wengine uelewa mpana kuhusu matukio muhimu ya kimataifa na kikanda, athari zake pamoja na mwenendo na uwezekano wa maendeleo yake katika siku zijazo.

TRT Afrika / Anadolu Agency — TRT Afrika / Anadolu Agency

Picha: Anadolu Agency