Israel yaitambua Somaliland kwa lengo la kijeshi na kuwahamisha Wapalestina: Rais wa Somalia

Rais wa Somalia, Hassan Sheikh Mohamud, amesema kuwa eneo lililojitenga la Somaliland limekubali kuwapokea Wapalestina na kuandaa kambi ya kijeshi ya Israel, ili ipate kutambuliwa na Israel kama taifa huru, akiashiria kuwa hayo ni kwa mujibu wa ripoti za kijasusi..

Aidha amesema kwamba hatua ya Tel Aviv kuitambua Somaliland ilikuwa “ya kushangaza sana na isiyotegemewa,” akiongeza kuwa ilitokea “ghafla,” huku Israel ikiwa taifa la kwanza tangu mwaka 1991 kuitambua Somaliland kama nchi huru.

Rais Mohamud alisema hayo katika mahojiano na shirika la habari la Al Jazeera siku ya Jumanne.

Somaliland, ambayo ilitangaza kujitenga na Somalia mwaka 1991, imekuwa ikijiendesha kama eneo linalojitawala bila kutambuliwa kimataifa.

Serikali ya Mogadishu inakataa kujitenga kwa Somaliland, inaona eneo hilo kuwa sehemu ya Somalia, na inachukulia mawasiliano yoyote ya moja kwa moja nayo kuwa ni ukiukaji wa uhuru na mamlaka ya taifa.

“Tumekuwa tukijaribu kuunganisha nchi kwa njia ya amani,” alisema Mohamud.

Alisema pia kwamba Somaliland imekubali kujiunga na Mikataba ya Abraham, iliyotiwa saini mwaka 2020 kati ya Israel na Umoja wa Falme za Kiarabu, Bahrain, Sudan, na Morocco kwa ajili ya kurekebisha na kuhalalisha uhusiano wao.

Kwa mujibu wa Rais wa Somalia, Israel inalenga kudhibiti njia muhimu za majini kama Bahari ya Shamu, Ghuba, na Ghuba ya Aden, na kuitambua Somaliland ni njia ya kuhalalisha uwepo wake wa siri uliokuwapo tayari katika eneo hilo, kulingana na ripoti za kijasusi.

Kiongozi huyo wa Somalia alisema Israel haiko katika eneo hilo kwa lengo la kuleta amani, bali inalenga kuwahamisha Wapalestina kwa nguvu kwenda Somalia.

Upinzani wa kimataifa unaongezeka kufuatia hatua ya Tel Aviv kuitambua Somaliland, huku nchi nyingi zikilaani hatua hiyo kama ukiukaji wa sheria za kimataifa na tishio kwa uthabiti wa kikanda.

Siku ya Jumatatu, nchi wanachama wa Baraza la Usalama la Umoja wa Mataifa zilieleza wasiwasi wao katika kikao cha dharura, zikisema kuwa hatua hiyo inaonekana kulenga kuwahamisha Wapalestina kutoka Gaza.

Karibu wanachama wote wa baraza hilo waliilaani Israel kwa kuitambua Somaliland, huku Marekani ikijizuia kulaani, ikisema kwamba msimamo wake kuhusu eneo hilo lililojitenga haujabadilika.