Isra’ila na shirin halasta hukuncin kisa ga fursunoni

Kwamitin tsaron ƙasa na Majalisar Dokokin Israel ya amince da wani ƙudirin doka da ke neman halasta hukuncin kisa kan fursunoni Falasɗinawa.

Ana sa ran za a kai ƙudirin gaban majalisa domin ƙuri’a ta ƙarshe, wanda zai ba shi damar zama doka idan aka amince da shi.

Rahotanni sun nuna cewa ƙudirin zai ba da damar aiwatar da hukuncin kisa cikin kwanaki 90, tare da takaita damar ziyara da hulɗa da lauyoyi ga waɗanda aka yankewa hukunci.

Haka kuma, ƙudirin ya tanadi cewa ba lallai sai alƙalai sun haɗa baki ba kafin yanke hukuncin kisa, kuma za a iya aiwatar da hukuncin ba tare da buƙatar masu gabatar da ƙara sun nemi hakan ba.

Ga wasu fursunoni, ƙudirin ya tanadi rufe damar ɗaukaka ƙara ko neman afuwa, lamarin da ya janyo damuwa daga masu kare haƙƙin bil’adama.

Itamar Ben-Gvir ya maraba da matakin, yana mai bayyana shi a matsayin babban ci gaba a tsarin tsaro na ƙasar.

Ƙungiyoyin kare haƙƙin bil’adama sun nuna damuwa cewa matakin na iya ƙara tsananta halin da fursunoni Falasɗinawa ke ciki.

Tushen labari: Newstimehub