Iran ta ce ta kama sojojin Amurka, Amurka ta musanta zargin

Babban jami’in tsaro na Iran, Ali Larijani, ya yi iƙirarin cewa an kama wasu sojojin Amurka, yana zargin gwamnatin Washington da ƙoƙarin ɓoye lamarin.

Larijani ya bayyana hakan ne a wani saƙo da ya wallafa a shafinsa na X a ranar Asabar, inda ya ce an sanar da shi cewa an kama sojojin Amurka da dama.

Sai dai ya zargi Amurka da cewa tana ƙoƙarin bayyana cewa an kashe sojojin ne a yaƙi maimakon a ce an kama su.

“An sanar da ni cewa an kama sojojin Amurka masu yawa. Amma Amurkawa suna cewa an kashe su a yaƙi,” in ji Larijani.

Ya kuma ƙara da cewa duk da ƙoƙarin da Amurka ke yi, ba za ta iya ɓoye gaskiyar lamarin na dogon lokaci ba.

Sai dai rundunar sojin Amurka ta musanta wannan iƙirari cikin gaggawa.

Wani mai magana da yawun Rundunar Sojin Amurka da ke aiki a Gabas ta Tsakiya da wasu sassan Asiya (CENTCOM) ya shaida wa Al Jazeera cewa ikirarin Iran ba gaskiya ba ne.

Ya ce zargin da gwamnatin Iran ta yi na kama sojojin Amurka wani ɓangare ne na yaɗa bayanan da ba su da tushe.

Ƙaruwar tashin hankali a yankin ya biyo bayan hare-haren sama da Amurka da Isra’ila suka kai kan Iran a ranar 28 ga Fabrairu, lamarin da ya jawo asarar rayuka masu yawa da kuma hare-haren ramuwar gayya daga Iran kan wuraren da ke da alaƙa da Amurka a yankin.

Tushen labari: Newstimehub