Ethiopia yakanusha madai ya Trump kuwa Marekani ilifadhili bwawa lake kubwa

Waziri Mkuu wa Ethiopia, Abiy Ahmed, siku ya Jumanne alikanusha madai ya Rais Donald Trump kwamba bwawa jipya kubwa la nchi hiyo lilifadhiliwa na Marekani.

Bwawa la Grand Ethiopian Renaissance Dam (GERD) lenye thamani ya dola bilioni 4 za Marekani limejengwa kwenye Mto Nile, na litazalisha megawati 5,150 za umeme, hivyo kuwa bwawa kubwa zaidi barani Afrika kwa uwezo wa uzalishaji wa umeme.

Misri, mshirika wa karibu wa Marekani na nchi inayotegemea Mto Nile kwa asilimia 97 ya maji yake, inaliona bwawa hilo kama “tishio la uwepo wake.”

Mwezi uliopita huko Davos, pembeni mwa Mkutano wa Jukwaa la Uchumi Duniani, Trump aliunga mkono madai hayo akisema kuwa bwawa hilo “lilifadhiliwa na Marekani na kimsingi linazuia Mto Nile.”

Waziri Mkuu wa Ethiopia alipinga kauli hiyo katika hotuba yake kwa wabunge siku ya Jumanne.

“Hatujapokea hata birr moja (fedha ya Ethiopia) kama mkopo au msaada wa kifedha kutoka kwa chanzo chochote cha kigeni kwa ajili ya ujenzi wa bwawa hili kubwa. Tumefanikisha hili kupitia dhamira na mchango mkubwa wa wananchi wa Ethiopia wanaoishi nchini na wale waishio ughaibuni,” alisema Abiy.

Kodi na mikopo

Ujenzi wa bwawa la GERD, ulioanza mwaka 2011, ulifadhiliwa kupitia kodi na mikopo kutoka kwa raia wa Ethiopia.

Kampuni ya ujenzi inayosimamia bwawa hilo imesema hakuna sababu ya kuzuia maji kwenda Misri.

Bwawa hilo “huachia maji kwa ajili ya kuzalisha umeme. Si miradi ya umwagiliaji inayotumia maji,” alisema Pietro Salini, Mkurugenzi Mtendaji wa Webuild, mkandarasi mkuu wa mradi huo, katika uzinduzi mwezi Septemba.

Salini pia alisema mradi huo ulifadhiliwa kikamilifu na Ethiopia.

“Hakuna hata mkopeshaji mmoja wa kimataifa aliyekuwa tayari kuweka fedha kwenye mradi huu,” aliliambia shirika la AFP.

Trump, ambaye ni mshirika wa muda mrefu wa rais wa Misri, aliahidi “kurejesha mazungumzo katika mkondo sahihi” kati ya Misri na Ethiopia.

Misri imesema iko tayari “kuanzisha upya juhudi za upatanishi,” lakini hadi sasa mamlaka za Ethiopia bado hazijatoa majibu.