Burhan ya yi watsi da tayin Amurka na tsagaita a Sudan, ya ce shi ne 'mafi muni a tarihi'

Shugaban Gwamnatin Riƙo na Sudan, Janar Abdel Fattah al-Burhan, ya ƙi amincewa da wani tayin tsagaita wuta da masu shiga tsakani ƙarƙashin jagorancin Amurka suka gabatar, yana kiran ta 'mafi muni a tarihi', a yayin da yunƙurin da ake yi na dakatar da mummunan yaƙin da ake yi a ya ƙaru.

A cikin wani bidiyo da sojoji suka sakiea daren Lahadi, Janar Burhan ya ce bai yarda da tayin ba, ya zargi masu shiga tsakani da nuna son kai a ƙoƙarinsu na kawo ƙarshen yaƙin.

Sudan ta shiga ruɗani a watan Afrilun 2023 lokacin da rikicin ya ɓarke tsakanin sojoji da dakarun ƙungiyar RSF a birnin Khartoum da sauran wurare a ƙasar.

Bisa ƙididdigar Majalisar Dinkin Duniya, wannan mummunan yaƙin ya kashe mutane fiye da 40,000, amma ƙungiyoyin agaji suna cewa wannan adadin ya wuce haka. Wannan yaƙin ya haifar da matsalar jinƙai mafi girma a duniya inda yaƙin ya tilasta wa mutum miliyan 14 barin muhallansu.

Hanya mai wahala zuwa zaman lafiya

Ƙasashen huɗu masu shiga tsakani sun kasance suna ƙoƙarin kawo ƙarshen yaƙin da dawo da ƙasar a kan hanyar dimokuraɗiyya wadda juyin mulkin soja a shekarar 2021 ya ƙara dagulawa. Ƙasashen sun haɗa da Amurka, Saudiyya, Masar, da Haɗaddiyar Daular Larabawa (UAE).

A wannan watan, Shugaba Donald Trump ya ce yana shirin mayar da hankali wajen taimakawa domin nemo mafita ga yaƙin Sudan bayan Yarima Mai Jiran Gado na Saudiyya Mohammed bin Salman ya roƙe shi ya ɗauki mataki a lokacin ziyararsa a Fadar White House.

Massad Boulos, wani mai ba da shawara a Amurka kan al'amuran Afirka, ya shaida wa kamfanin dillancin labarai na AP a baya cewa sabon tayin yana kira da a tsagaitawa domin jinƙai na tsawon watanni uku, sai a bi shi da wani tsari na siyasa na watanni tara. RSF ta ce ta amince da tsagaitawar, bayan fushin duniya kan mummunar zaluncin da wasu 'yan ƙungiyar suka aikata a birnin Al Fasher na Darfur.

‘Son kai a shiga tsakani’

Burhan, duk da haka, ya ce tayin ana ɗaukarsa a matsayin mafi muni daga ƙarshe, saboda zai kawar da sojojin ƙasa, ya rushe hukumomin tsaro kuma zai bar dakaru masu riƙe da makamai a wurin da suke — yana nufin RSF.

Idan har shiga tsakanin ya ci gaba ta wannan hanya, za mu ɗauke shi a matsayin shiga tsakani mai nuna son kai, in ji shi.

Ya caccaki mai bayar da shawarar Amurka inda ya zarge shi da ƙoƙarin “tilasta wasu sharuɗɗa a kanmu.” Ya ƙara da cewa: Muna tsoron cewa Massad Boulos zai zama cikas ga zaman lafiya da duka mutanen Sudan suke nema.

A maganganunsa, Burhan ya caccaki UAE. Ya ce tunda a cikin masu shiga tsakani har da ƙasar da ke yankin Gulf, ƙungiyar masu shiga tsakanin “ba za a iya wanke su daga laifi ba musamman bayan duniya ta shiada irin goyon bayan da UAE ta bai wa ‘yan tawaye domin su yaƙi ƙasar Sudan.”

UAE ta musanta cewa tana tallafawa dakarun na RSF.

Burhan ya ƙaryata kuma cewa sojojin suna ƙarƙashin ikon 'yan ta'adda ko cewa sun yi amfani da makaman masu gaba a yaki da RSF — tuhumar da gwamnatin Trump ta yi a watan Mayu.

Burhan ya ce sojojin za su yarda da tsagaitawar wuta ne kawai idan RSF ta janye gaba ɗaya daga yankunan farar-hula don ba da damar 'yan gudun hijira su koma gidajensu, kafin fara tattaunawa don warware rikicin ta hanyar siyasa.