Uturuki na Misri zakaza ushirikiano, zashirikiana kutafuta amani Gaza na suluhu za kikanda

Rais wa Uturuki Recep Tayyip Erdogan amesema janga la kibinadamu Gaza linaendelea licha ya sitisho la mapigano, akisisitiza kuwa Ankara inashirikiana kwa karibu na Misri kuleta amani. Akizungumza pamoja na Rais wa Misri Abdel Fattah el-Sisi, Erdogan alieleza kuwa Misri ni mshirika mkubwa zaidi wa kibiashara wa Uturuki barani Afrika, na kwamba nchi hizo zinalenga kuongeza biashara kutoka dola bilioni 8–9 hadi bilioni 15, hususan katika sekta za nishati na usafirishaji.

Erdogan pia alisisitiza umuhimu wa ushirikiano katika biashara ya baharini na usalama wa majini, akibainisha kuwa kuimarika kwa uhusiano wa pande hizo kunadhihirika pia kupitia ongezeko la watalii.

Kuhusu masuala ya kikanda, Erdogan alisema Uturuki na Misri zina lengo la kulinda umoja wa Libya, kusitisha mapigano Sudan, na kutatua migogoro inayohusisha Iran kwa diplomasia. Aidha, alisisitiza kuwa Uturuki inaunga mkono mabadiliko ya kisiasa Syria na akakemea hatua ya Israel kutambua Somaliland, akisema ni ukiukaji wa mamlaka ya Somalia.

Kwa upande wake, Rais Sisi alieleza kuwa Uturuki ni mshirika muhimu wa Misri na kwamba uwekezaji wake ni wa maana kwa uchumi wa taifa hilo. Aliongeza kuwa Uturuki imechangia pakubwa katika kusitisha mapigano Gaza na akatoa wito wa juhudi za pamoja kutafuta suluhu za kudumu kwa migogoro ya eneo.

CHANZO: Newstimehub