Tsohon ɗanwasan Nijeriya Eneramo ya mutu sakamakon bugun zuciya yayin wasan sada zumunta

Tsohon ɗanwasan gaba na Nijeriya, Michael Eneramo, ya mutu bayan ya faɗi a fili yayin wasan sada zumunta ranar Juma'a.

Alamu sun nuna cewa, Eneramo mai shekaru 40, ya gamu da bugun zuciya mintuna biyar bayan dawowa daga hutun rabin lokaci a wasan sada zumuntar,' in ji Hukumar Kwallon Kafar ta Najeriya, tana ambato rahotannin farko-farko.

Eneramo ya buga wasa gaba daya kafin a tafi hutun rabin lokaci a Ungwan Yelwa da ke Kaduna, a safiyar Juma'a.

'Wannan abin tashin hankali ne matuƙa. Ba ni da kalmomin da zan iya bayyanawa a wannan lokaci,' in ji Sakatare Janar na NFF, Mohammed Sanusi.

Eneramo ya buga wa Nijeriya wasanni 10 bayan ya ƙi karɓar damar wakiltar Tunisiya, inda ya yi fice a kulob-kulob kuma yake duba yiwuwar samun shaidar zama ɗan ƙasar.

Magoya bayan ƙungiyar Espérance Sportive ta Tunis sun sanya masa suna 'The Tank', kuma, a cewar NFF, ya taimaka wa ƙungiyar wajen samun wasu kofuna. Haka kuma ya buga wasa a Turkiyya a ƙungiyoyin Sivasspor, Beşiktaş da Başakşehir, da sauran su.

Eneramo ya fara wakiltar Najeriya a wasan sada zumunta da Jamaica a Fabrairun 2009, sannan ya zura ƙwallonsa ta farko a wasan ƙasa da ƙasa a karawar da suka yi da Ireland watanni uku bayan wasan Jamaica, wanda shi ma wasa ne na sada zumunta.