Shugaban hukumar ƙwallo da kocin Portugal sun zauna don lallashin Ronaldo bayan ƙin saka shi wasa

Bayan rikicin da ya biyo bayan ƙin saka gwarzon ɗanwasan Portugal, Cristiano Ronaldo a wasansu da Norway na ranar Lahadi, a yanzu rahotanni na cewa an warware saɓanin.

Wasu jaridun ƙasar na cewa an samu nasarar yin wani zama tsakanin Ronaldo, da kocin tawagar ƙasar, Jorge Jesus, da kuma shugaban hukumar ƙwallo ta ƙasar, Pedro Proenca.

Tun da fari an ambato cewa an samu tattaunawa tsakanin kocin da ɗanwasan, inda suka samu fahimtar juna kan abubuwan da suka faru.

Matsalar ta faro ne bayan Portugal ta buga wasan gasar Nations League tare da Norway inda ta doke ta da ci 2-1, amma har aka kammala wasan Ronaldo bai shiga ba.

An fara wasan Ronaldo yana kan benci kuma yayin da aka busa usur ɗin ƙarshe, an ga ɓacin rai a fuskar tauraron, wanda kuma ya ƙi gaisawa da magoya bayan tawagar lokacin da kai-tsaye ya bar filin wasan.

Rabon da Portugal ta buga wasa ba tare da saka Ronaldo ba tun a gasar Euro 2008. A yanzu ɗanwasan yana da shekaru 41, kuma akwai yiwuwar yana dab da yin ritaya.

Bayan kammala wasan, an jiyo koci Jorge Jesus yana ba da uzuri kan abin da ya faru, "Na shirya amfani da shi a zagaye na biyu, amma yanayin wasan bai ba da dama ba. Babu hikima a saka sitiraika mai irin ƙwarewarsa".

A halin yanzu da Portugal ke shirin buga wasa na gaba da Denmark, wasu rahotanni na cewa Cristiano Ronaldo bai halarci atisayen gabanin wasan ba. Amma dai ana sa ran Ronaldo zai buga wasan da za a yi a maraicen Alhamis.

Tawagar Portugal tana da maki shida daga wasanni biyu kuma tana saman teburin Guruf 4.