RSF 'iliwaua' zaidi ya raia 25 Kaskazini mwa Kordofan, katika ukiukaji wa sheria za kibinadamu

Shambulio lililofanywa na kikosi cha wanamgambo cha Rapid Support Forces (RSF) limesababisha vifo vya raia zaidi ya 25 katika eneo la Umm Badr, jimbo la Kordofan Kaskazini nchini Sudan, kulingana na Mtandao wa Madaktari wa Sudan (Sudan Doctors Network).

Katika taarifa iliyotolewa Jumamosi, mtandao huo usio wa kiserikali ulisema kuwa video inayosambaa mtandaoni inaonyesha wanajeshi wa RSF wakiwaua raia katika eneo hilo.

Uzito wa tukio hilo unaongezwa na dalili zinazoonyesha kuwa mauaji hayo yalifanywa kwa misingi ya kikabila, kwa kisingizio cha kuwatuhumu wahanga hao kuwa wanaunga mkono Jeshi la Sudan (SAF), taarifa hiyo ilisema.

"Mauaji ya raia kinyume cha sheria ni uhalifu mkubwa na ukiukwaji wa wazi wa sheria za kimataifa za kibinadamu na viwango vya haki za binadamu," mtandao huo ulisema.

Kulenga watu kwa kuzingatia asili yao ya kikabila au kijamii kunaweza kutishia amani ya kijamii na kuchochea matamshi ya chuki pamoja na vurugu, ilionya.

Madaktari hao walitoa wito kwa Umoja wa Mataifa na mashirika ya haki za binadamu kuanzisha uchunguzi huru na kuwawajibisha wahusika.

RSF haikutoa maoni ya haraka kuhusu taarifa hiyo. Hata hivyo, kundi hilo kwa kawaida hudai kuwa halilengi raia—madai ambayo yanapingwa na mamlaka za Sudan pamoja na mashirika ya kimataifa ya haki za binadamu.

Jeshi la Sudan lakomboa karibu maeneo 11

Hivi karibuni, jeshi la Sudan limepata mafanikio katika maeneo mapana ya Kordofan Kaskazini kufuatia mapigano na vikosi vya RSF, na kutangaza kuwa limedhibiti maeneo 11 katika jimbo hilo.

Tangu mwishoni mwa mwezi Julai, jeshi la Sudan (SAF) limedhibiti maeneo makubwa ya Kordofan Kaskazini baada ya kutwaa tena mji muhimu wa kimkakati wa Bara, pamoja na maeneo ya Jabra al Sheikh na Umm Siyala, na kulinda barabara kuu inayounganisha Bara na Omdurman, magharibi mwa mji mkuu, Khartoum.

Majimbo matatu ya eneo la Kordofan—Kaskazini, Magharibi na Kusini—yameshuhudia mapigano kati ya SAF na RSF tangu mwezi Oktoba mwaka jana.

Sudan imekuwa ikikabiliwa na vita kati ya jeshi la Sudan na RSF tangu mwaka 2023; vita ambavyo vimesababisha vifo vya makumi ya maelfu ya watu na kuwafanya takriban watu milioni 13 kuyahama makazi yao, kulingana na makadirio ya Umoja wa Mataifa na mashirika ya kimataifa.