Darakta Janar na hukumar NCDC, Dr. Jide Idris, ya ce Gwamnatin Tarayyar Nijeriya za ta ba da fifiko ga tsaro da jin daɗin ma'aikatan jinya a tsawon lokacin aikin tunkarar cutar Ebola.
Adadin mutanen da suka haɗu da matar da aka fara gano cewa tana da ɗauke da cutar Ebola a watan Oktoban 2026 a Nijeriya ya ƙaru zuwa 53, a cewar Hukumar Hana Yaɗuwar Cututtuka ta Nijeriya (NCDC).
Hukumar ta ce mutanen sun haɗa da ma’aikatan jinya da kuma masu aiki a cikin gida da mijin matar da aka gano ta kamu da cutar.
Hukumar NCDC, a rahoton da ta fitar kan yadda lamura ke tafiya, ta ce an ba da rahoto na wani da ake tunanin ya kamu da cutar a jihar Ribas ranar 23 ga watan Oktoba, sai dai gwaje-gwaje sun nuna cewa mutumin bai kamu da cutar Ebola ba.
“Kawo yanzu an gano tare da bibiyar mutum hamsin da uku da ke da alaƙa da wadda aka fara gano cewa ta kamu da cutar. Waɗanda aka bayyana sun haɗa da ma’aikatan jinya da masu aikin cikin gida da mijinta,” in ji rahoton da aka fitar ranar 24 ga watan Oktoba na 2026.
Da yake ba da ƙarin bayani game da wadda aka fara gano cewa ta kamu da cutar, rahoton ya ce majinyaciyar wata mace ce mai shekara 42 wadda ta dawo daga Uganda ta hanyar Addis Ababa ranar 3 ga watan Oktoba na 2026, a jirgin da ya shigo Abujan Nijeriya daga ƙasashen ƙetare.
Hukumar ta ce ta fara nuna alamun cutar ne kwanaki huɗu bayan ta shiga ƙasar kuma aka kai ta wani asibiti mai zaman kansa ranar 10 ga watan Oktoba da kuma wani asibitin ranar 11 ga watan Oktoba.
“Ta sake zuwa wani asibiti mai zaman kansa ranar 11 ga watan Oktoban 2026, inda aka karɓe ta. An sanar da NCDC ranar 19 ga watan Oktoba, kuma bayan haka ne aka yi bincike mai zurfi tare da karɓar jini don gwaji,” in ji rahoton.
“An samu tabbaci daga ɗakin gwaje-gwajen hukumar NCDC ranar 20 ga watan Oktoba na 2026. Alamu wajen gabatar da ita sun haɗa da zazzaɓi da zawayi da ciwon sassan jiki da kuma ciwon maƙwogoro. Ba a da ba da rahoton zuban jini ba.”
A wani ɓangaren kuma, Darakta Janar na hukumar, Dr. Jide Idris, ya tabbatar wa ‘yan Nijeriya cewa Gwamnatin Tarayyar Nijeriya ta hanyar Ma’aikatar Lafiya da jin Daɗin Jama’a da hukumar NCDC da hukumomin lafiyar birnin Tarayya Abuja da abokanan aiki sun jajirce wajen ɗaukar matakin da ya dace game da cutar da aka tabbatar a birnin.
Ya ce hukumar za ta bibiyi waɗanda suka haɗu da mai cutar na tsawon kwanaki 21 daga ranar da suka haɗu da ita domin tabbatar da cewa ba su kamu da cutar ba.
Kazalika ya bayyana cewa haɗuwa da wanda ta kamu da cutar ba ya nufin cewa mutum ya kamu da cutar ne, yana mai kira ga ‘yan Nijeriya su ba da haɗin kai ga jami’an hukumar idan suka kira domin bibiyarsu.
Manyan jami'an diflomasiyyar Turai da Gabas ta Tsakiya za su gana a Istanbul
Babba taron shiga tsakani karo na 9 da za a fara ranar Juma’a zai tattara mahalarta masu mukamin minista da manyan wakilan kungiyoyin kasa da kasa.
Nijar: Hukumomi sun ɗauki matakan tsaro na gaggawa a Agadez bayan harin da ya kashe mutum 12
Gwamnan yankin, Manjo Janar Ibra Boulama Issa, ne ya jagoranci taron gaggawa na Majalisar Tsaron Yankin a ranar Laraba, 21 ga Oktoba, 2026, domin nazarin halin tsaro da kuma ɗaukar matakan da suka dace bayan harin.
Turkiyya na shirin zuba jarin dala biliyan 2 a sufurin sama da na sararin samaniya cikin shekaru uku
Tsarin kashe kuɗi na shekara uku na Ankara ya mayar da hankali ne kan kayayyakin sufurin sama da ayyuka na sararin samaniyan ƙasa da kuma kasuwantar da fasahar da aka samar daga cikin gida.
An kiyaye duk haƙƙoƙi. Newstimetr © 2026
