Ghana yamrudisha Balozi wake kutoka Nigeria kwa tuhuma za udanganyifu katika uchaguzi

Rais John Mahama wa Ghana amemrejesha nyumbani Balozi wake kutoka Nigeria, Baba Ahmed, kufuatia madai ya kujihusisha na udanganyifu katika uchaguzi wa bunge wa Jimbo la Ayawaso Mashariki.

Ikulu ya Ghana mjini Accra iliieleza kwamba Baba Ahmed, ambaye alikuwa ni miongoni mwa wagombea, amerudishwa kutokana na tuhuma za udanganyifu katika uchaguzi akiwa afisa wa umma.

Kulingana na tamko hilo, Balozi huyo anatakiwa kurudi nyumbani mara moja, na uamuzi huo ulilenga kuepuka dhana yoyote ya ukiukwaji wa maadili au mgongano wa maslahi dhidi ya Kanuni za Maadili kwa Walioteuliwa katika nafasi za Kisiasa serikalini.

Ingawa tuhuma za kununua kura ziliwekwa dhidi ya wagombea wengi walioshiriki mchujo katika uchaguzi huo.

Uamuzi huo unafuatia madai ya kuwashawishi wapiga kura wakati wa mchujo wa wabunge wa Chama cha Kitaifa cha Demokrasia (NDC) uliofanyika Jumamosi katika Jimbo hilo.

Tamko lilisema kuwa Rais amemuagiza Waziri wa Mambo ya Nje kumrejesha Balozi baada ya Katibu Mkuu wa NDC kutangaza kuwa chama kimeanza uchunguzi juu ya tukio hilo.

“Rais pia ameona taarifa ya umma ya Katibu Mkuu wa NDC ikieleza kuwa chama kimeanza uchunguzi wa madai yanayotokana na mchujo.

“Bila kuingilia michakato ya ndani ya chama inayoendelea, na kwa kuzingatia viwango vya tabia vinavyotarajiwa kwa maafisa wa umma, Rais anachukulia ni muhimu kuchukua hatua thabiti ili kuhifadhi uadilifu wa nafasi za umma.

“Hatua za kurudishwa zinaanza mara moja, na Waziri wa Mambo ya Nje ameagizwa kuchukua hatua za kiutawala na kidiplomasia zinazohitajika ili kutekeleza agizo hili,” tamko liliongeza.