Bunge la Seneti DRC lapitisha mswada wa kura ya maoni kumruhusu Tshisekedi kuwania muhula wa tatu

Seneti ya Jamhuri ya Kidemokrasia ya Congo Jumamosi iliidhinisha kwa kauli moja sheria ya kura ya maoni, hatua ambayo inaweza kumruhusu Rais Felix Tshisekedi kugombea muhula wa tatu madarakani.

"Kati ya maseneta 78 walioshiriki katika upigaji kura, wote 78 waliunga mkono mswada huo; hakukuwa na kura za kupinga wala za kujizuia kupiga kura," alisema Rais wa Seneti, Jean-Michel Sama.

Mswada huo sasa utawasilishwa kwa rais ili autie saini na kuufanya kuwa sheria, kufuatia kuidhinishwa kwake na Bunge la Kitaifa siku chache zilizopita.

Sheria hiyo itakapopitishwa, itamruhusu rais kurekebisha katiba kupitia bunge maalum la kutunga katiba, likifuatiwa na kura ya maoni, iwapo kutatokea "tatizo kubwa la utendaji" katika taasisi za serikali.

Chini ya katiba ya sasa, rais anaruhusiwa kuhudumu kwa mihula miwili pekee.

Mswada huo uliidhinishwa awali na bunge mwezi Juni, ambapo muungano unaounga mkono serikali ya Tshisekedi una idadi kubwa ya wabunge.

Hata hivyo, uliwasilishwa tena kwa ajili ya kufanyiwa marekebisho baada ya Mahakama ya Katiba kuibua wasiwasi kuhusu vipengele vilivyompa rais mamlaka ya kuitisha kura ya maoni kuhusu suala lolote linalochukuliwa kuwa la umuhimu wa msingi.

Mahakama ilitaka wabunge waweke wazi masharti yatakayoruhusu kuitishwa kwa kura ya maoni.

Kwa mujibu wa katiba ya sasa, rais anaruhusiwa kuhudumu kwa mihula miwili ya miaka mitano kila mmoja.

Tshisekedi yuko tayari kwa muhula wa tatu

Tshisekedi, ambaye muhula wake wa pili na wa mwisho unatarajiwa kumalizika mwaka 2028, alisema mapema mwaka huu kuwa angekubali kupewa mamlaka tena iwapo wananchi wa Kongo wangemuomba kufanya hivyo.

Kauli yake ilizua upinzani kutoka kwa makundi ya upinzani, ambayo yana hofu kuwa mabadiliko hayo ya katiba yanaweza kumfungulia njia ya kuendelea kubaki madarakani zaidi ya kikomo kilichopo

TRT Afrika / َAA — TRT Afrika / َAA

Picha: َAA