Ana hasashen kuɗin da Angola za ta kashe kan tallafin fetur a 2026 zai kai dala biliyan hudu

Angola na iya kashe kuɗi har kwanzan tiriliyan 3.8 (dala biliyan 4.16) wajen tallafa wa farashin man fetur a wannan shekara, adadin da ya kusan ninka hasashen farko na ƙasar, wanda bai kai kwanzan tiriliyan biyu ba. Wani babban jami’in ma’aikatar kuɗi ne ya bayyana hakan ga kamfanin dillancin labarai na Reuters a ranar Juma’a.

Ƙarin kuɗin da ake kashewa ya nuna matsin lambar kuɗi da ƙasar da ke samar da man fetur ke fuskanta, yayin da hauhawar farashin makamashi sakamakon yaƙin da ake ci gaba da yi a Gabas ta Tsakiya ke ƙara yawan kuɗin da ake kashewa domin samun rangwamen man fetur a cikin gida domin farashinsa ya ci gaba da kasancewa ƙasa.

Ƙaruwar kuɗin tallafin na ƙara matsa wa gwamnati lamba ta gaggauta shirin cire tallafin a hankali, wanda ta fara a shekarar 2023. Sai dai hukumomin ƙasar na fargabar ɗaukar matakin cikin gaggawa saboda tsoron illolin tattalin arziki da zamantakewa, kamar yadda Ottoniel dos Santos, sakataren harkokin kuɗi da baitulmalin ƙasar Angola, ya shaida wa Reuters.

“Dole ne mu mai da hankali ba kawai kan cire tallafin ba, har ma da bunƙasa tattalin arzikinmu ta hanyar samar da wasu hanyoyin samun kuɗaɗen shiga,” in ji dos Santos a wata hira da aka yi da shi a gefen taron shekara-shekara na Asusun Ba da Lamuni na Duniya (IMF) da Bankin Duniya a birnin Bangkok.

“Ana aiwatar da shi a hankali”

“Ya zuwa yanzu, ana aiwatar da matakin ne a hankali,” in ji shi, yana magana kan rage tallafin.

“Amma idan aka samu wata dama da za a iya amfani da ita, kuma muka ga cewa illar matakin ga mutanen da suka fi rauni ba za ta kai yadda muka yi hasashe ba, to zai kasance da sauƙin aiwatar da shi,” in ji shi.

A yanzu ƙasar na sa ran farashin ɗanyen mai zai kai matsakaicin dala 90 kan kowace ganga zuwa ƙarshen shekara, adadin da ya haura farashin dala 61 kan kowace ganga da ta yi amfani da shi wajen tsara kasafin kuɗinta na shekarar 2026.

Duk da cewa gwamnati ba ta gabatar da kasafin kuɗin shekarar 2027 ba, wanda ake sa ran gabatarwa a ƙarshen wannan wata, dos Santos ya ce hasashen farashin man fetur da za a yi amfani da shi ba zai bambanta sosai da hasashen Asusun Ba da Lamuni na Duniya (IMF) na dala 71.50 kan kowace ganga ba.

Gwamnatin ƙasar na sa ran samar da ɗanyen mai ya kai ganga miliyan 1.045 a kowace rana a shekarar 2027, wanda zai yi daidai da yawan man da ake samarwa a wannan shekara.